مناوشات

.
There was an error in this gadget

Monday, January 9, 2012

أنا إخوان



لأنى يوم 26 يناير وأنا قاعد فى كوالالمبور بتفرج على السى ان ان. وبشوف الحكومة المصرية تتهم الإخوان بتفجير الوضع قلقت. ولما الإخوان نفوا مسئوليتهم عن مظاهرات يناير على السى ان ان فرحت جدا وقلت هو ده اللعب. صح كده عشان الفزاعة الدولية والداخلية متبوظش حلم تكرار ثورة تونس. يبقى أنا كده إخوان.

لأنى فضلت أسبوع فى صداع دائم لكى اتخذ قرارى فى التصويت على الاستفتاء. ولسوء حظى اهتديت أن نعم هى الخيار الأصوب - على الأقل من رأى -  ولصدفة كونية لا علاقة لها مثلا باخراج الجيش من السياسة بأسرع وسيلة ولا مثلا إن الدستور يتم وضعه بطريقة ديموقراطية ولا إن مثلا نقلل الفترة الانتقالية وخسائرها ولا إن الأطراف الغربية تلحق ترتب أوراقها. صحيت من النوم لقيت الإخوان بيقولوا نعم زى. مش مشكلة يبقى انا إخوان.

أنا إخوان عشان رفضت الدستور أولا. وبعد ما كنت من أشد مؤيدى البرادعى بقيت لا ارتضيه سياسيا لموقفه غير الديموقراطى - من رأى الإخوانى طبعا - وبما إنى عملت كده. يبقى لا يا حبيبى متهزرش. انت إخوان.

ولأنى كنت ضد تأجيل الانتخابات . ومصر على إنها تتعمل فى يونيو. وهاجمت مظاهرات الشباب واعتصامتهم وضغطهم بغلق مجمع التحرير او طلب تاجيل الانتخابات - مع انى شباب يعنى - يبقى اقفش الواد ده إخوان.

ولأنى مثلا هاجمت تحالف الإخوان والسلفيين انتخابيا. انتقدت التسويق الإسلامى للتصويت لهم على أنه أمانة
- راجع مناوشات: صوتك أمانة..بس مش أوى !
http://aabobakr.blogspot.com/2011/11/blog-post_07.html?spref=tw -  يبقى انا اخوان بردو.

ولأنى لم أنتخب قائمة الإخوان فى مجلس الشعب فلازم إنى إخوان وش طبعا.

ولأنى مش بستحمل المغالطات المنطقية والتدليس الإعلامى أو التسلسلى للأحداث من أول فبراير إلى الان يبقى انت مش معايا يبقى انت إخوان يا حبيبى.

يمكن عشان قرأت للغزالى والقرضاوى بقيت إخوان. مع إنى قرأت لجلال أمين والمسيرى ومعتز عبدالفتاح وعلاء الأسوانى. بس خلاص خلصت. إخوان وبلاش كلام كتير.

ولإنى كل ما اتكلم ابتدى كلامى أنا مش إخوان يا جماعة اسمعونى بس. فكله يضحك ويقول ايوا ايوا. انت اخوان.

ولانى هاجمت البسطاويسى والسلمى فى موضوع الوثائق والجيش. وغلطت وقولت إن وثيقة البرادعى الاولى كانت بداية الموضوع. - راجع البرادعى والبسطاويسى والسلمى http://aabobakr.blogspot.com/search?updated-max=2011-11-21T09:19:00-08:00&max-results=7

وقلت إنه لا يجوز لاى حد يفرض مبادئ دستورية ورفضت المبدأ مش التطبيق - البرادعى قال وثيقة السلمى مشوهة يعنى اعترض عىل التطبيق لا المبدأ - والإخوان أكثر من هاجم الوثيقة- يبقى أنا إخوان...طيب.

لأنى فى الندوات واللقاءات والحوارات والنقاشات بسمع الى قدامى نازل شتيمة وهجوم على الإخوان. ولما يجى دورى فى الكلام وانقد ما قاله منطقيا بدون التعرض أساسا لمواقف الإخوان السياسية. بس ابين ان الكلام الطرف الاخر متناقض ومغالطات. الناس الى كانت منسجمة وهادية ومتعلمة تقاطعنى وتهاجمنى وصوتها يعلى وساعات تشتم. عندها حق أصلى إخوان.


ممكن مثلا عشان اتضايقت من ساويرس لما سافر امريكا الشمالية وقعد يغلط بالصوت والصورة  ويطلب تدخل أمريكا لدعم الاحزاب الليبرالية بقيت كده اخوان. ويمكن بردو لما انتقدت موقف الإخوان من تصريحات إردوغان لما نزل مصر بردو بقيت اخوان - راجع مناوشات: يا عزيزى كلنا علمانيون http://aabobakr.blogspot.com/2011/09/blog-post_13.html?spref=tw

يمكن لما كتبت فى يوليو مثلا إن النشطاء فى سبيلهم لخسارة الشارع. ولما اتكلمت فى لقاء اقول أن الطليعة الثورية والشعب لازم يفضلوا حاجة واحد ومينفصلوش كده أنا بقيت اخوان. راجع مناوشات: رسالة إلى إخوانى النشطاء http://aabobakr.blogspot.com/2011/07/blog-post.html?spref=tw
يبقى اجيبها من الاخر كده أعلنها إنى اخوان وخلاص. خلاص يا جماعة انا بقيت اخوان اهه. اعمل ايه بقى. حد يقولى والنبى.


اه اخر حاجة نسيت معلش. ولانك هتسيب المقال الطويل العريض ده وهتنتقد حاجة مش مكتوبة فى اساسا وتتهمنى بيها وتسألنى طيب الإخوان عملوا كده ليه طيب.... يبقى أنا إخوان.. شكرا يا سيدى

4 comments:

  1. هاهاهاها...
    طيب يا أحمد الأسهل تبقى إخوان يا أخي وتريح الناس. علشان لما يهاجموك يبقى بيعملوا التصرفات المكتوبة في مانيوال العقل بتاعهم مع الإخوان. إنت كده بتعمل مواقف غريبة مش موجودة في الكتاب, يتصرفوا معاك إزاي؟!!

    ReplyDelete
  2. أضيف صوتي للتعليق الأول أعلاه
    أنا أعاني من نفس الفوبيا الإخوانية وعندما أتكلم مع الإخوان بيقولولي إنت تويتر....تخيل الشعور بقى, وأقعد على تويتر يتقاللي إنت إخوان هههه

    ReplyDelete
  3. ما هو ده اللي الأستاذ بلال فضل اتكلم عليه, موضوع الإنسان ذو البعد الواحد, ثقافة ضابط أمن الدولة اللي عاوز يحط ملفك في درج معين علشان يريح دماغه ويخلص! فطالما كلامك شكله كده يدي على إخوان الناس ليه تتعب نفسها وتحاول تفهم فكرك ووجهة نظرك؟!!
    رغم ان الإنسان في الواقع مش كده, وفي حاجات كتيرة بتشكل فكره وطريقة اتخاذه للقرار

    ReplyDelete
  4. شكرا لأصحاب التعليقات الأفاضل:
    بس انا خاب أملى

    محدش دخل شتمنى ومحدش اخوان دخل يجيب لى الكارنية !! إنه حقا عالم متوحش

    ReplyDelete